Taumurinn er hringofinn í báða enda og rennur því vel í gegn um hringi á mélum og gjörð. Miðhluti taumsins er flatur og situr vel í hendi. Lásarnir snúast með taumnum og því snýst ekki upp á hann. 

Hringteyming í tvítaumi býður fjölbreyttari möguleika til að vinna með hestinn frá jörðinni en ef notaður væri einfaldur taumur. Hann á mikinn þátt í þjálfun og leiðréttingu reiðhestsins. Hægt er að vinna vel með hestinn án þyngdar knapans. Hringteyming í tvítaumi krefst hins vegar meiri kunnáttu notanda en einfaldur taumur. Það er því ráðlagt að sækja sér þekkingu á hringteymingu í tvítaumi hjá kennurum eða úr lesefni.