Flýtilyklar
Grasfræblöndur
Uppgræðslublanda
Þolin grasfræblanda til uppgræðslu á svæðum sem njóta lítillar umhirðu.
Uppgræðslublanda er einkar hentug grasfræblanda til að loka sárum og til sáningar í rofabörð, á mela og önnur hrjóstrug svæði. Hún hentar vel á opin svæði sem njóta lítillar umhirðu. Blandan inniheldur þurrkþolnar, fljótsprottnar og harðgerðar grastegundir sem binda jarðveg og hindra frostlyftingu.
Fæst í 1 og 10 kg sekkjum.
Innihald: Vallarrýgresi ROKADE 30%; túnvingull CAPRICCIO/CALLIOPE 30%; rauðvingull MAXIMA 1 30%; vallarsveifgras MIRACLE 10%.
Vallarrýgresið er fljótt til og er mikilvægt til að binda jarðveginn sem fyrst auk þess að mynda mikinn lífrænan massa sem hjálpar til við bindingu jarðvegs. Vallarsveifgras er vetrarþolið og skriðult og lokar vel eyðum.
Ráðlagt sáðmagn er 2 kg/100 m2.
Ofangreint sáðmagn miðast við að ná góðum þéttleika á styttri tíma þar sem umfang er lítið, t.d. smárask í kringum mannabústaði, sumarhús, vegna skurðgraftar o.s.frv. Þegar sáð er á stærri skala, t.d. við uppgræðslu vegkanta og rasks í kringum stærri framkvæmdir má miða við 50-60 kg/ha, sem samsvarar 0,5-0,6 kg/100 m2.
Sáning í íbúðarhúsalóð getur verið ódýr en um leið afar heppileg leið til að koma upp fallegri grasflöt.
Hvernig berðu þig að?
Undirlagið og undirbúningur
Léttsandblönduð gróðurmold er besti valkosturinn sem undirlag. Ekki hafa hreinan sand nema að hámarki í 2-5 cm lagi yfir gróðurmold. Flötina þarf að grjóthreinsa og raka vel slétta fyrir sáningu. Þetta er mikilvægt þar sem þetta verður ekki auðveldlega lagfært eftir að grasið hefur komist á legg nema á lengri tíma.
Sáðskammtur
Þegar sáð er í litlar flatir má nota allt að 2 kg fræs á hverja 100m2 til að árangur verði sem skjótastur. Í stærri verkefni má fara í 0,5-1 kg.
Hvernig er gott að dreifa fræinu?
Hægt er að fá litla handknúna frædreifara í garðvöruverslunum. Fylgið leiðbeiningum þeirra. Fyrir minni aðgerðir er lítið mál að handdreifa fræinu en fyrir óreynda er gott að skipta sáðskammtinum í 2-3 hluta og miða við að dreifa fyrsta skammtinum langsum á flötina með því að ganga fram og tilbaka þar til búið er að dekka flötinn. Næsta umferð er farin þversum og sú þriðja á ská. Þannig næst sem best dreifing.
Æskilegt er að dreifa grasfræinu í lygnu veðri og því skal sáldra sem jafnast yfir flötinn. Að lokinni sáningu er gott að raka mjög léttilega yfir flötina með malarrhrífu. Að því loknu skal valtað yfir með litlum garðvalta (þeir fást t.d. vatnsfylltir hjá flestum tækjaleigum).
Áburðargjöf
Æskilegt er að bera þrígildan áburð á eftir sáningu, t.d. Græði 6, Blákorn eða Graskorn, um 4-6 kg/100m2. Gott er að fylgja sömu aðferðarfræði í sambandi við dreifinguna og fyrir fræið, þ.e. dreifa áburðinum í nokkrum umferðum. Ekki blanda fræi og áburði saman. Þessi efni eru mjög misþung og henta ekki til dreifingar í sömu aðgerð.
Umhirða eftir sáningu
Eftir sáningu er æskilegt að halda yfirborðinu jafnröku og vökva ef þurrkur gerir vart við sig. Notið hringúðara eða sambærilegan búnað sem dreifir jafnt og þétt yfir flötinn. Hættið að vökva áður en pollar myndast og endurtakið eftir þörfum.
Spírun og vöxtur
Grasfræblöndur á borð við Garðablöndu og Uppgræðslublöndu eru um 4-6 vikur að fullspíra, en fyrstu fræ byrja að gera vart við sig um 2 vikum eftir sáningu. Lágmarkið alla umferð og friðið svæðið fyrir leik barna á meðan fræið er að spíra og næstu 4-6 vikur eftir að svæðið er orðið grænt. Þetta er mikilvægt til að grasið náið að loka svæðinu og mynda svörð.
Reglubundin umhirða
Mjög gott er að kalka grasflatir með skeljasandi eða áburðarkalki með reglubundnum hætti, t.d. annað eða þriðja hvert ár. Þetta dregur úr því að mosi nái fótfestu. Áburðargjöf má miða við að hefja að vori þegar kominn er grænn hýjungur á flötina (4-5 kg 100m2) og svo má endurtaka 1-2svar eftir þörfum og dreifa þá sem nemur 2 kg/100m2. Græðir 6, Graskorn og Blákorn eru allt áburðartegundir sem geta gengið.
Fræblöndur með úthagagróðri? Gott ráð!
Fræblöndur með íslenskum úthagagróðri eru ekki fáanlegar þar sem framboð af slíku fræi er ekki til staðar. Ef úthagablettir í nágrenni sumarhúsa eru slegnir með orfi að haustlagi má dreifa slægjunni á bletti sem verið er að græða upp og þannig fá bæði fræ og plöntuhluta sem náð geta fótfestu í uppgræðslunni.
-
Smáratún TAÐA
Verð14.694 kr. -
Smáratún SLÆGJA
Verð19.716 kr. -
Smáratún BEIT
Verð17.484 kr. -
Garðablanda
Verð1.290 kr.
Virðisaukaskattur er dreginn af vörum til útflutnings.
Virðisaukaskatturinn er 24% af öllum vörum nema bókum og tímaritum sem bera 11%.